གངས་མཚོ། ངའི་སྙན་ངག་གི་སྲོག་ཤིང༌།

དེ་རིང༌།  ལྕགས་སྨྱུག་འདི་མཛུབ་རྩེ་རུ་བཟུང་བ་ན།

གངས་མཚོ།  ཁྱོད་ནི་ངའི་སྙན་ངག་གི་བརྗོད་བྱ་རུ་གྱུར།

ཁྱོད་དང་ངའི་སྙན་ངག་བར་ལ་ཡུན་རིང་གི་གཏམ་རྒྱུད་ཡོད་པས།

སེམས་པ་འདི་ང་དང་ངའི་ལག་པས་སྐྱོར་བཞིན།

སྙན་ངག་འདི་ང་དང་ངའི་མིག་ཆུས་བརླན་བཞིན།

གཏམ་རྒྱུད་ཞིག     ངས་འདི་ལྟར་བསམ་བཞིན་འདི་ལྟར་གླེང་འདོད་སྤྲོ།

 ཁ་སང༌།  ཁ་པར་གྱི་སྣེ་མོ་ན།  གློག་ཀླད་ཀྱི་ངོ་གདོང་ན།

གངས་མཚོ།  ཁྱོད་ལ་གླེང་མི་ཚར་བའི་གཏམ་རྒྱུད་མང༌།

ང་དང་ངའི་སྨྱུག་རྩེ་ན་བྲིས་མི་ཚར་བའི་སྙན་ངག་མང༌།

སྙན་ངག་དང་འཇིག་རྟེན་ལ་འུ་གཉིས་ཀྱིས་སེམས་དང་སེམས་པ་གླེན་ཞོར།

མིའི་སེམས་ནས་སྐད་ཆ་གླེང་ཞིང༌། མིའི་སེམས་ནས་སྐད་ཆ་ཉན་མྱོང༌།

སེམས་ཀྱི་སྐད་ཆ་དེ་སེམས་ཀྱིས་ཚོར་ཞིང་རྣ་བས་ཐོས་སྐབས།

གཏམ་རྒྱུད་དང་སྙན་ངག་གི་འཇིག་རྟེན་ལ་ད་གཟོད་དྲོད་སྣང་སྦྱིན།

སང་ཉིན། ཁྱོད་རང་ཁྱོད་ཀྱི་གཏམ་རྒྱུད་ཀྱི་འཇིག་རྟེན་ལ་བུད་འགྲོ།

གངས་མཚོ། ང་རང་ངའི་སྙན་ངག་གི་འཇིག་རྟེན་དུ་འཚོ་ཞོར།

ཁ་དོག་མི་འདྲ་བའྀ་འུ་གཉིས་ཀྱི་འཇིག་རྟེན་འདིའི་ཆེད་དུ།

ངའི་སེམས་ཀྱི་སྒེའུ་ཁུང་གིས་ཁྱོད་ལ་རྒྱང་ལྟ་བྱེད་ངེས།

ངའི་སྨྱུག་རྩེ་ནས་ཁྱོད་ཀྱི་གཏམ་རྒྱུད་ནམ་ཡང་བོར་མི་སྲིད།