ཕྱི་ནང་གི་གྲུབ་མཐའི་སྐོར་རོབ་ཙམ་གླེང་བ།
སྔོན་གླེང་གི་གཏམ།
མིའི་རིགས་ལ་ལོ་རྒྱུས་ཀྱི་དབུ་ཁྱུད་བཀོད་པ་ནས་བཟུང་ཤེས་རིག་གི་སྦྱང་བརྩོན་ཕྱིར་དུ་སྲོག་དང་བསྡོས་པའི་འཐབ་འཛིང་མཚམས་འཇོག་བྱས་མྱོང་མེད་ལ་བྱེད་ཀྱང་མི་སྲིད་པར་སྙམ། འདི་ནི་འགྲོ་བ་མིའི་རིགས་ཀྱི་ཆེས་རླབས་ཆེ་བའི་ཤེས་རིག་ལ་དུང་བའི་འཚོལ་སྙེག་ཅིག་ཡིན་པར་གདོན་མི་ཟ། དེ་འདྲའི་འགག་འཕྲང་གི་ལམ་ཁ་བརྒྱུད་པའི་ས་སྒང་རིལ་མོ་འདིའི་ཤེས་རིག་ཕལ་མོ་ཆེ་ཡིས་ཆེས་ཟབ་བརླིང་གི་དོན་རྒྱ་ཆེན་པོ་ཞིག་རྩོལ་མེད་དུ་འགྲོལ་གྱིན་ཡོད་པ་ལྟ་ཅི་སྨོས། དེ་བས་མཐའ་མེད་པའི་ཤེས་རིག་གི་ཀློང་རིམ་ན་སྐབས་བབས་ཀྱི་གླེང་བར་འདོད་པ་ནི་ཕྱི་ནང་གི་གྲུབ་མཐའི་སྐོར་ཡིན་མོད། འོན་ཀྱང༌། ཁོ་བོ་རྨོངས་མུན་གྱི་སྒྲོག་ཏུ་ཚུད་ནས་དེའི་སྐོར་གང་ཡང་མི་ཤེས་ཀྱང༌། ཡུལ་དུས་ཀྱི་དབང་གིས་སྐབས་འདིར་ཕྱི་ནང་གི་གྲུབ་མཐའ་སྨྲ་བའི་རིགས་མི་འདྲ་བ་ཇི་ཡོད་དང༌། དེ་དག་གི་ལྟ་གྲུབ་གཙོ་བོ་གང་ཡིན་འདི་ལྟར་གླེང་བར་སྤྲོ་སྟེ།
